2022 දෙසැම්බර් 1

Mee Massoo.lk

Sri Lanka No 01 Famous Sinhala News Portal – "පුවත් සොයා ඉගිලෙන ප්‍රවෘත්තිකාර කම"

ජබ් තක් හේ ජාන් චිත්‍රපට දැක්ම.

ඔහු මේජර් සමර් ආනන්ද් හෙවත් නොමියෙන මිනිසා. The Man Who Cannot Die. ඉන්දීය හමුදාවට අයත් බෝම්බ නිෂ්ක්‍රීය අංශයේ ප්‍රධාන ධූරයක් දරන නිළධාරියෙකි. ඔහුට නොමියෙන මිනිසා යන නාමය ලැබී ඇත්තේ ඇයි? මේජර් සමර් වූ කලි කිසිදු දිනෙක සිය ආරක්ෂක නිළ ඇඳුම ඇඟ ලා ගෙන රාජකාරියෙහි නියුතු වන්නෙක් නොවේ. මේ වන විට ඔහු විසින් නිෂ්ක්‍රීය කොට ඇති බෝම්බ සංඛ්‍යාව 97ක් වන අතර අනාරක්ෂිත ව වැඩකටයුතු සිදු කළත්, මෙතුවක් ඔහුගේ කෙස් ගසකට වත් හානියක් සිදු වී නොමැත.

මේ ඔහුගේ 98 වන නිෂ්ක්‍රීය කිරීම යි. සිය සහායක දේවන්ට සොයා ගත නොහැකි වුවත් ඔහු මෙම බෝම්බයේ සංඥා නිකුත් වන ස්ථානය ඉතා දක්ෂ අන්දමින් සොයා ගනී. අනතුරු ව ඉතා සැහැල්ලුවෙන් යතුරුපැදියේ නැගී පිට යන්නේ කව් පද වැලක් මුමුණමිනි.
“ඔබේ කෙහෙරැළි සුළ‍ගේ සෙලවෙයි
එය මට අමතක නෙවෙයි
ජීවිතය තිබෙන තුරාවට…
ජීවිතය තිබෙන තුරාවට…” (Jab Tak Hai Jaan)

ඇය සුරූපී කාන්තාවක්. කැමරාවක් ද කරෙහි එල්ලා ගෙන මුහුද දෙසට පිය මනින්නේ කිසිවෙකුත් කිරීමට පසුබට වන වීර ක්‍රියාවක් කරනු පිණිස ය. කැමරාව ක්‍රියාත්මක කොට තබන ඇය මුහුද මැද ඇති ගලක් මත සිට දියට පනියි. එහෙත් අවාසනාවකට මෙන් ඇය නොදැන සිටි දේ නම් මෙවෙලෙහි ජලය ඉතා ශීතල බව ය. උදව් ඉල්ලා කෑ ගසන තරුණිය බේරා ගන්නේ ඔහු විසිනි. එහෙත් සාමාන්‍ය චිත්‍රපටියක් සේ එතැනින් ඉදිරියට කතාව ගලා යන්නේ නැත. ඇය කතා කරමින් සිටින අතරේ ඔහු පිට ව යයි. සමර්ගේ කබායෙන් වැසී සිරුර උණුසුම් කර ගත් ඇය අකීරා රායි නම් වෙයි. කබාය ගලවා දමන අතර ඒ තුළ තිබී වැටෙන යමක් අහුලා ගන්නා ඇය එය දින පොතක් බව දැක, කියවීමට පටන් ගනී. මෙතැන් සිට දිග හැරෙන්නේ සමර් ආනන්ද්ගේ කතාව යි.

තරුණයෙක් දේවස්ථාන භූමියේ හිම ඉවත් කරමින් සිටියි. ඒ අතර ඉතා සුන්දර තරුණියක් දිව යනු දකින ඔහු ඇය පසුපස ගොස් දේවස්ථානයට ඇතුළු වෙයි. ඇය සිටින්නේ ජේසුස් වහන්සේ සමඟ සුහද කතා බහක ය. හෙට දිනයේ තමා බැලීමට පැමිණෙන මනාලයා නැවත හරවා යවන ලෙසත්, ඒ වෙනුවෙන් තමා මින් පසු ලෝම කබා ඇඳීම නතර කරන බවත් ඇය පවසනු ඔහුට ඇසෙයි. තරුණියගේ අපූරු කතා විලාසයත් මන බඳනාසුලු රූපයත් කෙරෙහි ලොබ වන ඔහු අතින් ගීයක් ලියවෙයි. බොහෝ පිරිසක් ගමන් ගන්නා නගරය මැද ගිටාරයක් වයමින් තරුණයා ගී ගයයි.
“මේ සිහි මුලා වූ සංචාරකයා සොයන්නේ කුමක්දෝ…”
මද වේලාවක් ගීය ගයන විට ඇගේ අතින් ඔහුගේ දෙපතුලට කාසියක් වැටෙයි. නෙතට නෙත හමු වෙයි. හදවතක් සලිත වෙයි.
ඔහු, එනම් සමර්, කීයක් හෝ සොයා ගැනීම සඳහා පසුබෑමකින් තොර ව ලන්ඩන් නගරයේ ඕනෑම කුලී වැඩක් කිරීමට පසුබට නොවන්නෙකි. උත්සව ශාලාවක වේටර්වරයෙකු ලෙස රැකියාව කරන දිනක ඔහුට ඇගේ විවාහ ගිවිස ගැනීම දැක ගැන්මට අවස්ථාව සැලසෙනුයේ නොසිතූ අන්දමිනි. සමර් කම්පා වනුයේ ඇගේ ඉල්ලීම ඉටු නොවීම නිසාවෙනි. ඇය මීරා. මීරා තාපර්. වැඩ කටයුතු කෙරීගෙන යන අතරතුර ඔහුට ඇය ශාලාව පිටුපසට වී සිගරටයක් උරනු දක්නට ලැබෙයි. දෙදෙනාගේ කතා බහේ දී සමර් මහමඟ ගී ගයන්නා බවත්, ඇය කුඩා කල පටන් එකට හැදුණු මිතුරා හා සතුටින් විවාහ වන බවත් හෙළි වෙයි. එනමුදු සමර්ගේ අදහස වන්නේ ඇය මේ විවාහයට නොකැමති බවයි.
“මුද්ද දානකොට ඔයා බැලුවේ එයාගේ ඇස් දෙක දිහා නෙවෙයි, වටේ ඉන්න අනිත් අය දිහා. අනික ඔයා ඔච්චර සතුටු නම් ඇයි මෙතනට වෙලා සිගරට් බොන්නේ? තවත් කියනවා නම්, ඔයා මොකටද ඔයාගේ හිතේ තියන දේවල් කවදාවත් ඇසුරු කරලා නැති කෙනෙකුට කියන්නේ?”

පසුදින මීරා සමර් හමුවට පැමිණෙන්නේ පවුම් 500ක් සමඟ ඉල්ලීමක් ද රැගෙන ය. එනම් ඔහු ඇයට පන්ජාබී ගීයක් ඉගැන්විය යුතු බවයි. අවසානයේ දී ඔහු ඇයට ගීතය උගන්වන්නත්, ඇය ඔහුට ඉංග්‍රීසි උගන්වන්නත් එකඟ වෙයි. Done Done London. සෑම දිනක ම පුහුණුවේ යෙදුණත් මීරා අසාර්ථක ය. සමර් ඊට හේතුව විග්‍රහ කිරීමට තරම් සමතෙකි. ඔහුට අනුව ඇය සමාජයට බිය ඇත්තියකි. එහෙයින් මීරා නම් උසස් පවුලක උපන් තරුණිය තුළ ජීවත් වන සැබෑ ගැහැනිය සොයා ගැනීමට ඔහු අපූරු උපක්‍රමයක් භාවිතා කරයි. ශිෂ්ට සමාජයෙන් ප්‍රතික්ෂේප වූ, සැබෑ මිනිසුන් කිසිදු බියකින් තොර ව වෙසෙන රාත්‍රී සමාජ ශාලාවකට ඔහු ඇය ගෙන යයි. එහි දී ඇය විසින් සිය සැබෑ රුව හඳුනා ගනු ලබයි.
“ඇසට ඇස හමු විය
ගිනි දලු නැගිනි…”

මීරාගේ සැබෑ ස්වරූපයෙන් වශී වන සමර් දුම්රිය නැවතුමේ දී ඇයට සිය ආදරය ප්‍රකාශ කරයි. අතිශය හැඟීම්බර වන ඔහු ඇය දැඩි ව සිප ගනී.
ඉන්දියානුවන්ට කෙතරම් අකැමැති වුවත්, ඉංග්‍රීසිකාරයෙකු හා ගිවිස ගෙන සිටියත්, මීරාගේ සිතෙහි ද සමර් වෙත ආදරයක් ඇති වනු වැළැක්විය නොහැකි ය. එහෙයින් ඇය ඔහු සොයා පැමිණෙයි. හදවත් එක් වුවත් සිරුරෙන් ඔවුන් බොහෝ ඈත ය. එක්වීම බලාපොරොත්තු රහිත ය. මීරා ඔහු දේවස්ථානයට ගෙන ගොස් මිතුරුකමින් ඔබ්බට නොයනු පිණිස පොරොන්දු කරවා ගනී. ඒ, සිය හැඟීම් පාලනය කර ගැනීම වෙනුවෙන් පමණක් ම බව ඇය නොසඟවා හෙළි කරනුයේ නෙතට කඳුළක් එක් කරමිනි.

මීරාගේ මව ඇය හා පියා අත්හැර වෙනත් අයෙකු සමග පලා ගොස් තිබුණේ ඇයට වයස 12 දී ය. ඒ බව සිහි කරමින් සිටි ඇයට මවගෙන් ත්‍යාගයක් සමඟ ලිපියක් ලැබෙයි. ඒ ඇගේ මව විවාහ වූ දවසේ හැඳ සිටි මංගල සාරිය යි. වසර 10කට පෙර කුමක් සිදු වුවත් මීරා සමර් කැටුව ඇය බැලීමට යන්නේ තමා උසස් පවුලකට අයත් බව නොව සැබෑ ලොවට අයත් සැබෑ ගැහැනියක බව පසක් කරවමිනි. අතිශය හැඟීම්බර වන මවත් දියණියත් වසර ගණනාවකට පසු එකිනෙකා දැකීමේ සතුට දරා ගත නොහැකි ව දැඩි ප්‍රහර්ෂයෙන් වැළඳ ගනිමින් හඩා වැටේ. ඇය සිය දියණියගේ සෑම උපන් දිනයක දී ම ත්‍යාගයක් මිළට ගත්ත ද, පියාට බියෙන් එය තමා වෙත ම තබා ගත්තීය. පුංචි පුංචි ටෙඩී සුරතලුන්, කුඩා බෝණික්කන්, පොත්පත්, විශාල පාට පෙට්ටි, ආභරණ ආදියෙන් මිදුල පිරෙයි. ඒ සියල්ල ඈ සිය දියණිය වෙනුවෙන් මිළ දී ගත් දෑ ය. මව දියණියගෙන සමාව අයැදියි. එහෙත් ඇය පවසන්නේ මව නිවැරදි බව යි. නැවත පැමිණෙන අතරමග මීරා නොබිය ව සිය හැඟීම් සමර් වෙත ප්‍රකාශ කරයි. දෙහද එක් වෙයි.
“මගේ සුසුම් ඔබේ සුසුම් සමඟ එක් වූ කල
මට ජීවිතය ලැබිණි…”

හදිසියේ මීරා බලා සිටියේ දී ම සමර් වාහනයක ගැටී බරපතල තුවාල ලබයි. ඇය මහ පාරෙහි ම දණ ගසා දෙවියන්ගෙන් යදින්නේ ඔහුගේ ජීවිතය යි. ඒ වෙනුවෙන් ඇය අසාධාරණ පොරොන්දුවක් ලබා දෙයි.
“ජේසුනී,කරුණාකරලා සමර් ව ජීවත් කරවන්න. මම පොරොන්දු වෙනවා ආයේ කවදාවත් එයාව හමු වෙන්නේ නැහැ කියලා…”
සමර්ගේ දීවි ගැලවෙයි. ඇය ඔහුගෙන් වෙන් වෙයි. කලකිරීමට පත් වන සමර් සියල්ල තම මිතුරාට පවරා නැවතත් ඉන්දියාවට යයි. දැන් ඔහු මේජර් සමර් ආනන්ද් ය.

කිසි දිනෙක හඩා නැති අකීරා මෙය කියවා කඳුළු සලයි. ඇගේ සිත සමර් නම් වූ ආදරණීය තරුණයා වෙත බැදෙයි. එහෙයින් කෙසේ හෝ ඔහු තමා වෙත ඇද ගනීමට උත්සාහ කරයි. ඒ වෙනුවෙන් අකීරා Discovery නාලිකාවේ නිදහස් මාධ්‍යෙව්දිනියක ලෙස මේජර් සමර් ආනන්ද් හෙවත් නොමියෙන මිනිසා පිළිබඳ වාර්තා වැඩසටහනක් කිරීම සඳහා ඔහුගේ කණ්ඩායම සමඟ ගමන් ගනී. ඉතා සමාජශීලී, එමෙන් ම කටකාර, හුරුබුහුටි තරුණියක වන ඇය මද වේලාවකින් කණ්ඩායමේ සියල්ලන්ගේ ම සිත් බැඳ ගනියි. එහෙත් සමර් ඇයට බොහෝ ඈත ය. දිනක් බෝම්බයක් නිෂ්ක්‍රීය කිරීමට උත්සාහ ගනිමින් සිටියෙදී ඔහු ඇගේ පණ අනූ නවයෙන් බේරා ගනී. පාපන්දු පහරක් වැදී බිඳී යන ඇගේ කැමරාව ඔහු විසින් සාදා දෙනු ලැබේ. අකීරාට අනුව සමර් යනු අපූර්ව මිනිසෙකි.
“දවාලට බෝම්බත් එක්ක හැප්පෙනවා. රෑට තනිය ම ආදර ගීත ගයනවා”

කෙසේ හෝ අකීරා සමර්ගෙන් සම්මුඛ සාකච්ඡාවක් ලබා ගනී. වැදගත් ප්‍රශ්නයක් ද ඉදිරිපත් කරයි. එනම් සමර් ආරක්ෂක කබාය නොඅඳින්නේ මන්ද යන්නයි. ඊට ලැබෙනුයේ ගැඹුරු පිළිතුරකි.
“බෝම්බවලට වඩා රිදීම් ඇති වෙන්නේ සිත් බිඳීම්වලින්. අපි ඒවායින් බේරෙන්න ආරක්ෂිත ඇඳුමක් නොඅඳිනවා නම්, එක වතාවක් විතරක් මැරෙන බෝම්බවලින් මොකට ආරක්ෂා වෙනවා ද?”
සමර් අකීරාගේ කෙළිලොල් බවට කැමති ය. නමුත් කිසිදු වැරදි අදහසක් නැත. එහෙත් ඇය ඔහු වෙත දක්වනුයේ යහළුකමක් නොව ආදරයකි. අන්තිමේ දී පරාජය භාර ගන්නා අකීරා නැවත හැරී යයි.


Discovery නාලිකාව අකීරාගේ වැඩසටහනට කැමති වුවත්, එය ප්‍රචාරය කිරීමට නම් සමර් ලන්ඩනයට ආ යුතු ය. ඇය එය කෙසේ වත් සිදු නොවන බව දැන දැනත් සමර් වෙත සිය ඉල්ලීම ඉදිරිපත් කරයි. සිතූ ලෙසට ම සමර් එය ප්‍රතික්ෂේප කරයි. දිනක් උදයේ සමර්ගෙන් අකීරා වෙත ඇමතුමක් ලැබේ.

“මම මේ Discovery කාර්යාලය ළඟ ඉන්නේ. මේ බිල්ඩින් ඔක්කොම එක වගේ නේ. මං කොහොමද හරි එක හොයා ගන්නේ?”
ඇගේ දිවියේ වාසනාවන්ත ම දවස එය යි. එසේ ම විනාඩි කිහිපයකින් එය ම ඇගේ අවාසනාවන්ත දිනය බවට පත් වෙයි. සමර් නැවතත් හදිසි අනතුරකට ලක් වෙයි.
මෙවර ගැටලුව ඉතා බරපතල ය. සිහි ලද සමර් අකීරා හඳුනා ගන්නේ නැත.
“කෝ මීරා? එයාට එන්න කියන්න. නර්ස් කිව්වා එයා එළියේ ඉන්නවා කියලා.”

අහස කඩා වැටේ. සමර්ගේ කෙටි මතකය අනතුර හේතුවෙන් නැතිවී ගොස් ය. දැන් ඔහු සිටින්නේ මෙයට වසර 10කට පෙර අනතුර සිදු වූ ස්ථානයේ ය. ඛාන් දොස්තරවරියගේ ඉල්ලීම පරිදි අකීරා මීරා සොයා පිටත් වෙයි. එහෙත් ඇය පෙර විවාහ ගිවිස ගත් පුද්ගලයා හා දියණිය සමඟ සතුටු වෙමින් සිටියි. එහෙයින් අකීරා ඇය සොයා කාර්යාලය වෙත යයි. තත්ත්වය දැන ගත් පසු මීරා සමර් වෙනුවෙන් රඟපෑමට තීරණය කර ගනී. සමර්ගේ මුල් කාලයේ යහළුවා වූ සේන් ද ඔවුන්ට උදව් කරයි. එය ඉතා පහසු ය. මන්දයත් සමර් තමා වෙත ලබා දුන් මුදලින් සේන් මේ වන විට ආපන ශාලාවක් ආරම්භ කර තිබේ. එහි නම වන්නේ ද Samar’s Kitchen ය. මද දිනකින් මීරා අකීරාට සැබෑව පවසයි. මීරා කිසිදු දිනෙක විවාහ වී නොමැත.

ඛාන් වෛද්‍යවරියගේ උපදෙස් පරිදි මීරා සමර්ට පවසන්නේ ඔවුන් දෙදෙනා විවාහ වී දැනට වසර 5ක් ගත ව ඇති බව යි. ඔවුනට ආපන ශාලාවක්, අතිවිශාල නිවසක් මෙන් ම ප්‍රාඩෝ රථයක් ද තිබේ. රෝහලේ සිට සමර් යන්නේ සේන්ගේ නිවසට ය. එහෙත් ඔහු සිතා සිටින්නේ එය තමන්ගේ බව ය. ඉන්දියානු ක්‍රමයට සමර් පිළිගන්නා මීරා ඔහු හා එක් ව දිවි ගෙවීමට පටන්ගනී. එහෙත් මීරා ඔහු සමග ලිංගික ව එක් වීමට නොකැමතිය. ඇය සිතා සිටිනුයේ එසේ වුවහොත් නැවතත් සමර්ගේ ජීවිතයට අනතුරක් වනු ඇති බව ය. ගින්දර සමඟ පුළුන් එක ළඟ පැවතිය නොහැකි ය. මද දිනකින් ම මීරා එය වටහා ගනී. එහෙයින් අකීරා වාර්තාකාරියක ලෙස සමර් වෙත පැමිණ ඔහුගේ මතකයට ඇතුළු වීමට උත්සාහ කරයි. එහෙත් එය අසාර්ථක ය. ඒ අතර ඇය ඔහු පිළිබඳ රහසක් සොයා ගනියි. සැබෑ සමර් බෝම්බ වෙත දක්වනුයේ දැඩි බියකි. එයින් අකීරා යථාර්ථය අවබෝධ කර ගනී.
“මීරා, සමර්ගේ ජීවිතයේ හමදාමත් ඉන්නේ ඔයා විතරයි. ඔයා දැන් සමර්ව දාලා යනවාට වඩා හොඳයි එයාව මරලා දාන එක.”

දිනක් ලන්ඩන් දුම්රිය පොළෙහි බෝම්බයක් අටවා තිබේ. අනපේක්ෂිත අයුරින් සමර් එය නිෂ්ක්‍රීය කරයි. එයින් ඔහුට සියල්ල සිහි වෙයි. සිහි ලැබීමත් සමඟ මීරා තමා සතු නොවන බව ද ඔහුට දැනෙන්නට පටන් ගනී. අසරණ මීරා වෙත දෝෂාරෝපණය කරන ඔහු, මීරා තමාට වඩා ජේසුස් වහන්සේ වෙත ආදරය දක්වන බවත්, ජේසුස් වහන්සේ ද හැම විට ම තමා රිදවන බවත් කියමින් කෝප වී, ඇය හැර දමා යන්නට යයි.
අකීරා Discovery නාලිකාවේ ස්ථිර තනතුරක් ලබා ගනී. මේජර් සමර් ආනන්ද් සිය 108 වන බෝම්බය නිෂ්ක්‍රීය කරන අතරතුර නොසිතූ යමක් සිදු වේ. මීරා සමර් සොයා පැමිණෙයි.
“අද මම මැරෙන්න ද යන්නේ?”

සුප්‍රකට අධ්‍යක්ෂ, යෂ් චොප්රා මහතාගේ අවසන් චිත්‍රපටය වන Jab Tak Hai Jaan හි දෙබස් හා තිර රචනයත් නිෂ්පාදනයත් ආදිත්‍ය චොප්රාගෙනි. ඒ. ආර්. රාහුමාන්ගේ සංගීතයෙන් හැඩ ගැන්වුණු මෙහි ශාරුක් ඛාන් (සමර්), කත්‍රිනා කායිෆ් (මීරා), අනුෂ්කා ශර්මා (අකීරා), අනුපම් ඛේර් (මීරාගේ පියා), රිෂී කපූර් (මීරාගේ මවගේ දෙවන සැමියා), නීතු සිං (මීරාගේ මව) ආදීහු රංගනයේ යෙදෙති. ජීවිතය තිබෙන තුරාවට ආදරය හදෙහි දරාගනිමින් දිවි ගෙවන පෙම්වතුන්, පෙම්වතියන් වෙනුවෙන් 2012 වසරේ දී පිදුණු තිළිණයකි, Jab Tak Hai Jaan.

ශ්‍රීනි ලංකා ජයකොඩි