නවතම පුවත්

විදෙස් සංචාරකයින් සදහා බලපැවැත්වෙන මාර්ගෝපදේශ නිකුත් කෙරේ

විදෙස් සංචාරකයින් මෙරටට ගෙන්වීමට අදාළ සෞඛ්‍ය මාර්ගෝපදේශ මාලාව මේ වන විට සෞඛ්‍ය සේවා අධ්‍යක්ෂක ජනරාල් විශේෂඥ වෛද්‍ය අසේල ගුණවර්ධන මහතාගේ අනුමැතිය යටතේ ප්‍රසිද්ධියට පත්කර තිබෙනවා.

එම මාර්ගෝපදේශයන්ට අනුව මෙරටට පැමිණෙන සියලුම සංචාරකයින් තමන් ගේ ගුවන් යානයට ගොඩවීමට පැය 96 කට පෙර PCR පරීක්ෂණයක් සිදුකර කොවිඩ් ආසාදිතයෙකු නොවන බවට තහවුරු කර තිබීම අනිවාර්ය කර තිබෙනවා.

මෙරටට පැමිණීමෙන් පසු ගුවන් තොටුපොළේ දී යලිත් වරක් PCR පරීක්ෂණයකට ලක්කෙරෙන අතර ඔවුන් සහතික කරන ලද හෝටලයක දින 14 ක කාලයක් නවාතැන් ගැනීමට ඔවුන්ට හැකිය.

මෙරටට පැමිණීමෙන් පසු සිදුකළ PCR පරීක්ෂණයේ දී ඔවුන් කොවිඩ් ආසාදිතයින් නොවන බවට තහවුරු වුවහොත් ඔවුන්ට ආරක්‍ෂිත බුබුලක් ලෙස වෙනත් හෝටල් කරා යෑමට අවසරය හිමිවේ.

මෙම දින 14 කාල සිමාව තුලදී සංචාරකයින්ට හෝටල් පරිශ්‍රයන් තුලින් පිටතට යාමට අවසරය හිමි නොවේ.

කොවිඩ් පැතිරිම වැළැක්වීමේ ජාතික ක්‍රියාන්විත මධ්‍යස්ථානය, සංචාරක මණ්ඩලය සහ සෞඛ්‍ය අමාත්‍යාංශය විසින් අවසර ලබාදී ඇති සංචාරක කලාප 14 තුල පමණක් ආරක්‍ෂිත බුබුලක් ලෙස මෙම විදේශිකයින්ට සංචාරය කිරිමට අවසරය හිමිවන අතර ඒ ඔවුන්ගේ PCR පරීක්ෂණ වාර්තා මත පදනම්වයි.

ගුවන් යානා වලින් පැමිණෙන සංචාරකයින් වෙනත් සංචාරකයින් සමග මිශ්‍ර විමට ඉඩ නොදීමට අදාළ සංචාරකයින් රැගෙන එනු ලබන සමාගම් විසින් කටයුතු කළ යුතුව ඇති අතර ඔවුන්ගේ නවාතැන් ගන්නා හෝටල්, ප්‍රවාහන පහසුකම් ආදිය සැපයීමද මෙම ක්‍රමවේදය අනුව සිදුකළ යුතුය.

ඊට අමතරව සංචාරක මණ්ඩලය විසින් විදෙස් සංචාරකයින් නවාතැන් ගන්නා හෝටල් ඊට සුදුසු ද යන්න සොයා බලා අවශ්‍ය නිර්දේශ ඉදිරිපත් කිරිම සිදුකළ යුතුවේ.

සෞඛ්‍ය සේවා අධ්‍යක්ෂකවරයා විසින් නිකුත් කළ සංචාරකයින් සඳහා වන මාර්ගෝපදේශ මාලාව පහතින් දැක්වේ..