නවතම පුවත්

මුව ආවරණ ගැන ඇසු විට “මදාවියෙක්” කිපෙයි, රංචුවක් රැගෙන එයි

ඉන්ධන හල් සේවකයෙකු උස්සා පොළවේ ගසයි

මුඛ ආවරණයක් පැලඳ නොසිටි පුද්ගලයෙකුගෙන් ඒ පිළිබඳව විමසූ පසු ඉන්ධන හල් සේවකයෙකුව උස්සා පොළොවේ ගැසූ සිද්ධියක් මීගොඩ ප්‍රදේශයෙන් වාර්තා වනවා.

මීගොඩ අලුත් පාර ප්‍රදේශයේ පිහිටි ඉන්ධන පිරවුම් හලක අද (06) අලුයම 05.30 ට පමණ මෙය සිදුව තිබෙනවා.

අදාළ පුද්ගලයා මුඛ ආවරණයක් නොපැලඳ ඉන්ධන ලබා ගැනීමට පැමිණ ඇති අතර එහිදී ඔහුට මුඛ ආවරණයක් පැලඳගන්නා ලෙස ඉන්ධන හල් සේවකයා පවසන අතර ඊට උරණ වූ අදාළ පුද්ගලයා තවත් පුද්ගලයෙකු සමග පැමිණ ඉන්ධන හල් සේවකයාව උස්සා පොළොවේ ගසා ප්‍රහාරයක් එල්ල කරන අයුරු ඉන්ධන පිරවුම් හලේ සවිකර තිබූ CCTV කැමරාවල සටහන්එව තිබෙනවා.

පහර කෑමට ලක්වූ ඉන්ධන පිරවුම්හල් සේවකයා පාදුක්ක දිසා රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා කළුබෝවිල රෝහලට මාරුකර යවා තිබෙනවා.

මීගොඩ පොලීසිය පවසන්නේ පහරදීමට සම්බන්ධ පුද්ගලයින් මෙතෙක් හඳුනා ගැනීමට නොහැකි වී ඇති බැවින් මහජනතාව එම වීඩියෝ දර්ශනවල සිටින පුද්ගලයින් දෙදෙනා හඳුනන්නේ නම් පොලීසියට දැනුම්දෙන ලෙසය.

මීගොඩ පොලිස් ස්ථානාධිපති, ප්‍රධාන පොලිස් පරීක්ෂක නෙවිල් ප්‍රියන්ත මහතාට 0718 592 179 යන අංකයෙන් දැනුම්දිය හැකි බවද මීගොඩ පොලීසිය වැඩිදුරටත් සඳහන් කරනවා.