ජල පිරිපහදුව සඳහා ලංකාවට ගෙන්වූ ” ලයිම්” වල ක්‍රෝමියම් ප්‍රතිශතය වැඩිවීමෙන් පිළිකා ඇතුළු විවිධ රෝග ඇතිවීමේ අවදානමක් පවතින බව පොදු ජන පෙරමුණේ හම්බන්තොට දිස්ත්‍රික් මන්ත්‍රී ඩී.වී චානක මහතා පාර්ලිමේන්තුවේදී අද (6)පැවසීය.
එම ලයිම් කන්ටේනර් 25ක් ලංකාවට ගෙනවිත් තිබෙන බව කී මන්ත්‍රීවරයා ශ්‍රී ලාංකික පරීක්ෂක කණ්ඩායමක් විසින් පරීක්ෂා කිරීමේදී එහි ක්‍රෝමියම් ප්‍රතිශතය වැඩි බව අනාවරණය වී තිබෙන්නේ යැයි ද පසුව පෞද්ගලික විද්‍යාගාරයකට ගොස් පරීක්ෂා කිරීමේදී ද අදාල කාරණය තහවුරු වී තිබෙන බව ද කීය.
ලංකාවේ වැඩිපුරම බීමට ගන්නේ ටැප් ජලය බව කී මන්ත්‍රීවරයා රත්මලාන, ගාල්ල සහ අඹතලේ අදාල පිරිපහදු කරන බව සඳහන් කළේය.
ජලය පිරිසිදු කිරීමේ මාර්ගෝපදේශ තිබෙන අතර ඒ සඳහා භාවිත කරන මූලද්‍රව්‍ය සහ සංඝටක වල මිලිග්‍රෑම් ප්‍රමාණ සඳහන් වෙන බව මන්ත්‍රීවරයා පැවසීය.
ජලයේ ක්‍රෝමියම් වැඩි වුවහොත් පිළිකා,වකුගඩු රෝග, අංග විකල දරු උපත් ඇතිවිය හැකි බවද මන්ත්‍රීවරයා සඳහන් කළේය.
සති දෙකක් තුළ මේ අලුත් ජාවාරම පටන්ගෙන තිබෙන බව කී ඩී.වී චානක මහතා මේවා සිදුවන්නේ කාගේ වුවමනාවකටදැයි ප්‍රශ්න කළේය.
එම කන්ටේනර් වහාම නැවත ප්‍රති අපයනය කරන්නැයි ද මන්ත්‍රීවරයා කීය.
ගම්පහ දිස්ත්‍රික් මන්ත්‍රී අශෝක රන්වල මහතා පැවසූයේ ලයිම් වල බැර ලෝහ අන්තර්ගත යැයි නැගුණු චෝදනාව බරපතල එකක් බවයි.
“ජලය පිරිසිදු කරන්නට භාවිත කරන ලයිම් ලොකු තාක්ෂණ ක්‍රියාවලියකින් හදන එකක් නෙමෙයි.ලයිම් වල ප්‍රධාන මූලාශ්‍රය වන්නේ හුණුගල්.හුණු ගල් ක්‍රම දෙකකට ගන්නවා. කොරල් පර ආශ්‍රිත හුණුගල් හා කඳු ආශ්‍රිත හුණුගල් තිබෙනවා.සාමාන්‍ය ආකාරයට උඳුන් වල මේ හුණුගල් පුළුස්සූ විට ඒවා කැල්සියම් ඔක්සයිඩ් බවට පත්වෙනවා.
කැල්සියම් ඔක්සයිඩ් වලට වතුර ගසා කැල්සියම් හයිඩ්‍රොක්සයිඩ් බවට පත්කර ගන්නවා. එම කැල්සියම් හයිඩ්‍රොක්සයිඩ් ජලය පිරිසිදු කරන්නට භාවිත කරනවා.මේ හුණු ගල් වල හෝ කැල්සියම් කාබනේට් වල ස්වභාවිකව බැරලෝහ අන්තර්ගත වන්නේ නැහැ.ඒ නිෂ්පාදන ක්‍රියාවලිය තුලත් එලෙස බැර ලෝහ අන්තර්ගත වන්නේ නැහැ.
හැබැයි වෙනත් ආකාරයකට ව්‍යාජ ලෙස වෙනත් ද්‍රව්‍ය එකතු වීම තුළ මීට බැර ලෝහ එකතු වන්නට ඉඩ තිබෙනවා.එමෙන්ම ලයිම් වල බැරලෝහ චෙක් කිරීමක්ද සිදු කෙරෙන්නේ නැහැ.අයථා ක්‍රමයකින් ලයිම් ලංකාවට ගෙනෙනවාද?නැද්ද? කියා මා දන්නේ නැහැ.ලයිම් කියන්නේ අප බුලත් විට වලට කන හුණු.මේ හුණුවල බැර ලෝහ තියෙන්න විදියක් නෑ.හුණුගල් මුහුදින් ගත්තත් බැර ලෝහ එකතු වන්නේ නැහැ. කඳු වලින් කඩා ගත්තත් බැර ලෝහ එකතු වන්නේ නැහැ.ලයිම් වලට බැරලෝහ අන්තර්ගත වී ඇතැයි නැගුණු චෝදනාව බරපතල තත්ත්වයක්.ඒ සම්බන්ධව සොයා බැලිය යුතුයි.සාමාන්‍ය ලයිම් වල එහෙම අන්තර්ගත වන්නේ නැතැයි මන්ත්‍රීවරයා කීය.
© අංජුල මහික වීරරත්න | සුජිත් හේවාජුලිගේ (ලංකාදීප)
About The Author
අත නොහැර කියවන තැන
පොලිස්පතිව හොයාගන්න බැරි රටේ අපරාධකරුවන් හොයාගන්නේ කොහොමද? – දේශබන්දු අතුරුදන්
ගිහිල්ලා මහ බැංකුව වට කරන්න ජනාධිපති උපදේශකයෙකු කියලා
රේගු පරීක්ෂාවක් නොකර බහාලුම් 323ක් නිදහස් කිරීමේ සිදුවීම ජනපති අනුරට අභියෝගයක් – අමාත්‍යංශ මට්ටමින් විමර්ශනයක්