ජනපති සහ අගමැති කොවිඩ් මර්ධන එන්නත් ලබාගෙන නැහැ! ප්‍රසිද්ධ මාධ්‍යයක පුවතක්

එන්නත් නොගෙන විදේශ සමුළුවලට සහභාගිවීමෙන් සදාචාරය උල්ලංඝනය කරන බවට චෝදනාවකුත් එල්ල කරයි.

ජනාධිපති ගෝඨාභය රාජපක්ෂ මහතා සහ අග්‍රාමාත්‍ය මහින්ද රාජපක්ෂ මහතා කොරෝනා මර්ධන එන්නත් ලබා ගෙන නොමැති බව අනිද්දා පුවත්පත වාර්තා කර තිබෙනවා.

එම පුවත්පතට අදාළ නිල වෙබ් අඩවියේ දැක්වෙන ලිපියක සඳහන් කර තිබෙන්නේ එලෙස එන්නත් මාත්‍රා කිසිවක් ලබා නොගෙන විදේශ සමුළුවලට සහභාගී වීම සදාචාර සම්පන්න නොවන බවයි.

ලෝකයේ බොහෝ රටවල රාජ්‍යය නායකයින් එන්නත් කරන වැඩපිළිවෙළ ආරම්භයේදීම කොරෝනා මර්ධන එන්නත් ලබා ගැනීමෙන් න්නත් කරන ක්‍රියාවලිය සඳහා ජනතාව උනන්දු කර වුවද මෙරට ජනාධිපතිවරයා හෝ අගමැතිවරයා කිසිදු අවස්ථාවක එවැනි වැඩසටහනකට සම්බන්ධ නොවූ බවද අදාළ ලිපියේ දැක්වෙනවා.

අනිද්දා පුවත්පතට අදාළ වෙබ් අඩවියේ පළ වූ සම්පූර්ණ ලිපිය පහලින්..

රාජපක්ෂ පවුලේ ලොකු අයියා වන චමල් රාජපක්ෂට කොවිඩ් වැළදී කොළඹ පෞද්ගලික රෝහලකට ඇතුලත් කළ බවට මාධ්‍ය වාර්තා කර ඇත. එම පුවත රාජපක්ෂ පවුලේ පාර්ශවයෙන් හෝ ආණ්ඩුවේ පාර්ශවයෙන් මේ වනවිටත් ප්‍රතික්ෂේප කර නැත.

චමල් රාජපක්ෂට කොවිඩ් වැළදී ඇත්තේ කොවිඩ් ප්‍රතිශක්තිකරණ එන්නත් ලබාගෙන තිබෙන තත්වයක් තුළද නැත්ද යන්න පැහැදිලි නැත. මන්ද නාමල් රාජපක්ෂ හැර දේශපාලන පිටියේ සිටින අන් රාජපක්ෂවරයකු කොවිඩ් ප්‍රතිශක්තිකරණ එන්නත ලබාගත් බවක් මෙතෙක් වාර්තා වී හෝ ප්‍රකාශයට පත්කර නැති නිසාය. නාමල් රාජපක්ෂ පාර්ලිමේන්තු මන්ත්‍රීවරුන්ට එන්නත් ලබාදීමේ වැඩපිළිවෙල යටතේ කොවිඩ් ප්‍රතිශක්තිකරණ එන්නත ලබාගත් බවට ඡායාරූප පවා ප්‍රසිද්ධියට පත්විය.

එසේ වුවද ජනාධිපති ගෝඨාභය රාජක්ෂ හෝ අගමැති මහින්ද රාජපක්ෂ කොවිඩ් ප්‍රතිශක්තිකරණ එන්නත් ලබාගත් බවට මෙතෙක් කිසිඳු දෙයක් ප්‍රකාශයට පත්වී නැත. වෙනත් රටවල නම් රාජ්‍ය නායකයෝ ඒ බව ප්‍රකාශයට පත් කරති. ඒ කොවිඩ් ප්‍රතිශක්තිකරණ එන්නත ලබා ගැනීම සඳහා සිය රටේ ජනතාව උනන්දු කිරීම සඳහා හා ඒ සම්බන්ධයෙන් අනියත බියක් ඇති කරගත යුතු නැති බව සන්නිවේදනය කිරීම සඳහාය. සමහර රටක රාජ්‍ය නායකයින් එම රටේ කොවිඩ් ප්‍රතිශක්තිකරණ වැඩසටහනේ පළමු එන්නත සංකේතාත්මකව ලබාගෙන එය පෙන්නුම් කරන අතර තවත් රාජ්‍ය නායකයින් එන්නත්කරණ වැඩ සටහනේ වයස් කාණ්ඩය අනුව හෝ වෙනත් හේතුවක් මත තමන්ට හිමි වාරය පැමිණි විට එන්නත ලබා ගනිමින් එම ආදර්ශයන් පෙන්වා ඇත.

රටේ එන්නත්කරණ වැඩසටහනේ ආරම්භයේ ජනතාවට පණිවිඩයක් ලබාදීම සඳහා ජනාධිපති ගෝඨාභය රාජපක්ෂ මෙන්ම අගමැති මහින්ද රාජපක්ෂ ද එන්නත් ලබාගන්නා බවක් ප්‍රකාශයට පත්නොකළ නිසා වයස අවුරුදු 60 ඉක්මවා සිටින බැවින් ඔවුන් දෙදෙනා එම වයස් කාණ්ඩයේ එන්නත්කරණය තුළ එන්නත් ලබා ගැනීම සිදුකළ යුතුය.

එහෙත් එවැන්නක්ද අප තවමත් දුටුවේ නැත. ඒ නිසා වයස අවුරුදු 60ට වැඩි එන්නත් ලබාගෙන නැති පුද්ගලයින් සොයා කුදලාගෙන ගොස් එන්නත් කිරීමේ හමුදා ක්‍රියාන්විතය තුළ ජනාධිපතිවරයාව හා අගමැතිවරයාව හඹා යෑමක්ද අප දිටිය යුතුව ඇත. එහෙත් එවැන්නක් දුටුවේ නැති නිසා කොවිඩ් 19 වැළැක්වීමේ ක්‍රියානිවිත මධ්‍යස්ථානයේ ප්‍රධානි යුද හමුදාපති ජෙනරාල් ශවේන්ද්‍ර සිල්වා එන්නත් ලබාගෙන නැති නිසා ජනාධිපති හා අගමැතිව සොයා ගොස් එන්නත් ලබාදී රටට ප්‍රසිද්ධ කළ යුතුය.

එන්නත් ලබාගත් බවක් ප්‍රකාශයට පත්කර නැති ජනාධිපතිවරයා හා අගමැතිවරයා මේ වනවිට විදේශ සංචාර දෙකකට පිටත්ව යන බව ප්‍රකාශ කර ඇත. ජනාධිපතිවරයා එක්සත් ජාතීන්ගේ සංවිධාන සැසිය ඇමතීමට ඇමරිකාවට යෑමට නියමිත අතර අගමැතිවරයා ඉතාලියේ පැවැත්වෙන සමුළුවක් ඇමතීමට ගොස් ඇත.

කොවිඩ් වසංගත තත්වය හමුවේ මේවනවිට රටකින් රටකට යම් පුද්ගලයකු සංචාරය කරන්නේ කොවිඩ් ප්‍රතිශක්තිකරණ එන්නත් සම්පූර්ණ වශයෙන් ලබාගෙනය. අධ්‍යාපන කටයුතු, රැකියා කටයුතු සඳහා හෝ වෙනත් කටයුත්තක් සඳහා යම් පුද්ගලයකු යම් රටකට ඇතුලු වනවානම් ඒ ඒ රටවල් නිවේදනය කරන්නේ අවශ්‍ය කොවිඩ් එන්නත් ලබාගෙන එහි තහවුරුවක්ද සමග පැමිණෙන ලෙසය.

එම කොන්දේසිය එක්සත් ජාතීන්ගේ සංවිධානය ඇමතීමට යන රාජ්‍ය නායකයකුට හෝ වෙනත් සමුළුවක් ඇමතීමට යන අගමැතිවරයකුට ලියවිලි පරික්ෂා කිරීම දක්වා සිදුවන්නේ නැති බව පැහැදිලිය. එහෙත් එසේ එම ජාත්‍යන්තර අවස්ථාවට සහභාගිවන රාජ්‍ය නායකයාට හෝ අගමැතිවරයාට සදාචාරාත්මක වගකීමක් තිබේ. ඒ එම ජාත්‍යන්තර සමුළුවට සහභාගිවන රාජ්‍ය නායකයින්, රාජ්‍ය තාන්ත්‍රිකයින් හෝ අනෙකුත් පිරිසෙන් තමන්ට කොවිඩ් බෝ වීමටත් වඩා එම පිරිසට කොවිඩ් බෝ නොකිරීම සම්බන්ධයෙන්ය.
එම සදාචාරාත්මක වගකීම එක්සත් ජාතීන්ගේ සමුළුවට සහභාගිවීම මගින් හා ඉතාලියේ සමුළුවට සහභාගිවීම මගින් ශ්‍රී ලංකාවේ ජනාධිපතිවරයා හා අගමැතිවරයා කඩකර ඇති බව එම සමුළු දෙකට සහභාගිවන රාජ්‍ය නායකයින් හා රාජ්‍ය තාන්ත්‍රිකයින් නොදන්නවා විය හැක. ශ්‍රී ලංකා ජනාධිපතිවරයාගේ හා අගමැතිවරයාගේ මේ සදාචාර සම්පන්න නොවන හැසිරීම එම සමුළුවලට සහභාගිවන රාජ්‍ය නායකයින් හා රාජ්‍ය තාන්ත්‍රිකයින් දන්නේ නම් කුමක් වනු ඇතිද?

© ලසන්ත රුහුණගේ – අනිද්දා

About The Author