නවතම පුවත්

ගෝඨා එළවීමට රනිල් රාජ්‍ය අනුග්‍රහයෙන් ගුලියක් අඹරයි : රිටර්න් වුණොත් රනිලුත් ගෙදර

අරගලයේ දුක සැප බලන්න කමිටුවකුත් අමුණයි

රට අකර්මණ්‍ය කරමින් ජනතාව ප්‍රශ්න රැසකට ඇද දැමූ ජනාධිපතිවරයාට ඉල්ලා අස්වන ලෙස බල කරමින් ගෝල්ෆේස්හි පැවැත්වෙන Gota Go Gama සිටින අරගලකරුවන්ට අවශ්‍ය පහසුකම් සලසා දෙමින් එම අරගලය අඛණ්ඩව පවත්වාගෙන යාම සඳහා අග්‍රාමාත්‍ය රනිල් වික්‍රමසිංහ මහතා විසින් වැඩපිළිවෙළක් ආරම්භ කර තිබෙනවා.

දේශපාලන විශ්ලේෂකයන් පෙන්වා දෙන්නේ මෙය ගෝඨාභය රාජපක්ෂ ජනාධිපතිවරයා ධුරයෙන් නෙරපා දැමීමට රනිල් වික්‍රමසිංහ අග්‍රාමාත්‍යවරයා විසින් සැලසුම් කර ඇති සූක්ෂම උපක්‍රමයක් බවයි.

මේ වන විට රනිල් වික්‍රමසිංහ අග්‍රාමාත්‍යවරයා විසින් Gota Go Gama අරගල භූමියට අවශ්‍ය පහසුකම් සැලසීම සඳහා කමිටුවක්ද පත්කර ඇති අතර එහි වගකීම එක්සත් ජාතික පක්ෂ නියෝජ්‍ය නායක රුවන් විජේවර්ධන මහතාට භාරදී තිබෙනවා.

එමෙන්ම ඒ වෙනුවෙන් නගර සභාවේ උදව් උපකාර ලබා ගැනීම සඳහා කොළඹ නගරාධිපති රෝසි සේනානායක මහත්මිය සම්බන්ධ කර ඇති වික්‍රමසිංහ මහතා, මෙම භූමියට අවශ්‍ය පහසුකම් ලබා දීම සඳහා නාගරික සංවර්ධන අධිකාරියේ නියෝජිතයකු, සෞඛ්‍ය අමාත්‍යාංශයේ නියෝජිතයකු, හමුදාව සහ පොලිසිය වෙනුවෙන් නියෝජිතයෙකු බැගින් එම කමිටුවට පත් කර ඇති බවයි වාර්තා වන්නේ.

මෙලෙස ඉතා සූක්ෂම ලෙස අරගලයට අවශ්‍ය පහසුකම් සලසමින් ජනාධිපතිවරයාට එරෙහිව නැගෙන හඬ ත්‍රිව්ර කිරීම මේ හරහා වික්‍රමසිංහ මහතාගේ බලාපොරොත්තුව විය හැකි බවයි දේශපාලන විශ්ලේෂකයින් සඳහන් කරන්නේ.

කෙසේ නමුත් රනිල් වික්‍රමසිංහ මහතා සහ ගෝඨාභය රාජපක්ෂ මහතා දේශපාලන ඩීල් කරුවන් ලෙස හඳුන්වමින් සමාජය තුළ විරෝධතාවයක් පැනනැගී ඇති මොහොතක අරගලකරුවන් මෙය අරගලය දිය කිරීම සඳහා රනිල් වික්‍රමසිංහ සහ ගෝඨාභය රාජපක්ෂ යන දෙදෙනා එක් ව සකස් කරන ලද සැලසුමක් ලෙස කියවා ගත හොත් එහි ප්‍රතිඵලය ලෙස අග්‍රාමාත්‍ය රනිල් වික්‍රමසිංහ මහතාට ද බරපතළ ජනතා ප්‍රතිවිරෝධයක් එල්ල වීම වැලැක්විය නොහැකි වනු ඇති බවයි ඔවුන් පෙන්වා දෙන්නේ.

එසේ වුවහොත් එල්ල වන අභ්‍යන්තර දේශපාලනික සහ ජනතා විරෝධය හමුවේ වික්‍රමසිංහ අග්‍රාමාත්‍යවරයාට ද සිය ධුරයට සමුදීමට සිදුවනු ඇති බවයි ඔවුන් සඳහන් කරන්නේ.