එක්සත් ජනපද ප්‍රහාරක ජෙට් යානයක් සිරියානු ගුවන් කලාපයේ ඉරාන මගී ගුවන් යානයකට අනතුරුදායක ලෙස ආසන්නයට පැමිණ තිබේ. ඉරානයේ “ඉරිබ්” රාජ්‍ය ප්‍රවෘත්ති දෙපාර්තමේන්තුව පවසන්නේ ඔවුන්ගේ “මහාන්” එයාර් ගුවන් යානයේ නියමුවාට වේගයෙන් සිය උන්නතාංශය වෙනස් කිරීමට සිදු වූ බවත් එහි ප්‍රතිඵලයක් ලෙස මගීන් කිහිප දෙනෙකුට තුවාල සිදු වූ බවත් ය. ඉරිබ් විසින් පළ කරන ලද වීඩියෝවක් තුළ මගී ගුවන් යානයේ ජනේලයෙන් එපිට පැහැදිලි ව දිස් වන අතර, එහි එක් ජෙට් යානයක් යානය ආසන්නයේ ඇති බව පෙනී යයි. තව ද මගී යානය තුළ මුහුණ තුවාල වී ලේ ගලන මගියෙකුගේ රූපයක් ද දිස් වේ. එසේ නම් හදිසියේ මගී යානයේ නියමුවාට සිය මාර්ගය වෙනස් කිරීමට සිදු වූ බව සත්‍යයක් බව නිගමනය කළ හැකි ය. මෙම සිදුවීම පිළිබඳ දැඩි ව විරෝධය පළ කරන ඉරානය, ඇමරිකාව වුවමනාවෙන් ම සාමාන්‍ය ජනතාවගේ ජීවිතවලට අනතුරු එල්ල කරන බවට චෝදනා කරයි.
එහෙත් ඇමරිකා එක්සත් ජනපද ආරක්ෂක අංශය මෙම චෝදනාව ප්‍රතික්ෂේප කරන බව පෙනේ. ඔවුන් දැනට වසර කිහිපයක සිට සිරියාවේ “ටැෆන්” බලකොටුව ආසන්නයේ සිය කඳවුරක් පවත්වාගෙන යන අතර හැම විට ම කඳවුරේ ආරක්ෂාව පතා ඒ වටා මුර සංචාරක ගුවන් ගමන් කිහිපයක් දියත් කරනු ලබයි. මෙසේ ගමන් කළ “එෆ් 15” නමැති ජෙට් යානය හදිසියේ ප්‍රාදූර්භූත වූ මගී යානය දැක කලබල වී ඇති අතර කඳවුරට පහර දීමට පැමිණ ඇති සතුරෙකු ද යන වග දැන ගැනීමේ ඇමුණින් මදක් කිට්ටු කර තිබේ. එහෙත් යානයේ බඳෙහි ලියා තිබු “මහාන්” යන නාමයත් මගීනුත් දුටු පසු අනතුරක් නොමැති බව දැන, එතැනින් ඉවත් වී තිබේ. එහෙත් ඒ වන විටත් මගී යානයේ නියමුවා හදිසි හැරවීම සිදු කර හමාර ව තිබූ අතර එයින් යානය තුළ සිටි මඟීන් ද කම්පාවට පත් ව තිබිණි. නැවත නැවතත් කරුණු පැහැදිලි කරමින් එක්සත් ජනපද මධ්‍යම අණදෙන ප්‍රකාශක කපිතාන් “බිල් අර්බන්” පැවසූයේ ඉරාකයේ සහ ජෝර්දානයේ දේශ සීමාව අසල “අල්-ටැන්ෆ්” හි පිහිටි එක්සත් ජනපද හමුදා කඳවුරේ සේවකයින්ගේ ආරක්ෂාව සහතික කිරීම සඳහා පමණක් ම මෙම පරීක්ෂාව සිදු කළ බව යි.
“මහාන් එයාර්” යනු 1991 දී ආරම්භ කරන ලද පෞද්ගලික ඉරාන ගුවන් සමාගමකි. එහෙත් ඉරානයේ ප්‍රභූ විප්ලවවාදී ආරක්ෂකයින්ට මූල්‍ය, ද්‍රව්‍යමය හා තාක්‍ෂණික සහය ලබා දෙන බවට චෝදනා කරමින් එක්සත් ජනපදය 2011 දී මහාන් එයාර් වෙත සම්බාධක පැනවීය. 2019 දී යුරෝපීය රටවල් කිහිපයක් ද එම සමාගමට අයත් යානා සිය ගුවන් තොටුපලවලට ගොඩබැසීම තහනම් කළහ. මැද පෙරදිග කොවිඩ් -19 ව්‍යාප්ත කිරීමට ගුවන් සේවය දායක වී ඇති බව මෑතක දී බී.බී.සී.ය කරන ලද පරීක්ෂණයකින් අනාවරණය විය. ඒ කෙසේ වුවත් ඉරාන විදේශ අමාත්‍යාංශයේ ප්‍රකාශක “අබ්බාස් මවුසාවි” කියා සිටියේ ඉරානය සිද්ධිය පිළිබඳව විමර්ශනය කරමින් සිටින බවත් අනාගතයේ දී අවශ්‍ය දේශපාලන හා නීතිමය පියවර ගනු ඇති බවත් ය.
About The Author
අත නොහැර කියවන තැන
ඉන්දියාවේ උමගක් තුළ සිරවුණු කම්කරුවන් බේරා ගැනීම ඇරඹෙයි
සිවු දින සටන් විරාමයකට කැමැත්ත
ඊශ්‍රායල් – හමාස් යුද්ධයට සටන් විරාමයකට යෝජනාවක්